សណ្តែកអាល់ម៉ង់ អាចនឹងជួយទប់ស្កាត់រោគទឹកនោមផ្អែម និងជំងឺបេះដូង

សណ្តែកអាល់ម៉ង់ អាចនឹងជួយទប់ស្កាត់រោគទឹកនោមផ្អែម និងជំងឺបេះដូង
ការបរិភោគសណ្តែកអាល់ម៉ង់ អាច​នឹង​ជួយ​ទប់​ស្កាត់​ការ​កើត​រោគទឹកនោមផ្អែម និងជំងឺបេះដូង។ នេះបើយោង តាម​លទ្ធផលនៃការ ស្រាវជ្រាវថ្មីមួយដែលគេបានចុះ​ផ្សាយ​ កាលពីពេលថ្មីៗកន្លងមកនេះ។

អ្នកស្រាវជ្រាវ បានរកឃើញថា ការបញ្ចូល​សណ្តែក​អាល់​ម៉ង់​ទៅក្នុងអាហារ អាចនឹងជួយរារាំងការកើតជំងឺទឹកនោម​ផ្អែម ប្រភេទពីរ ដែល ជាប្រភេទរោគទឹកនោមផ្អែម ដែលកើតឡើងច្រើនបំផុត ពោលគឺមានចំនួនរហូតដល់ ៩០ ទៅ ៩៥ ភាគរយ នៃអ្នកកើត រោគទឹកនោម ផ្អែម​ទាំង​អស់​។

មិន​ត្រឹមតែអាចទប់ស្កាត់ជំងឺទឹកនោមផ្អែម ដែលពាក់ព័ន្ធនឹងរោគធាត់ និងការមិនហាត់ប្រាណប៉ុណ្ណោះទេ ប៉ុន្តែ​សណ្តែក​អាល់ម៉ង់ ក៏នឹងអាចទប់ស្កាត់ជំងឺបេះដូងផងដែរ។ នេះបើតាមសេច ក្តីរាយការណ៍ដែល​បាន​ចុះផ្សាយ​នៅ​ក្នុង​ព្រឹត្តិបត្រ American College of Nutrition។

អ្នកកើតរោគទឹកនោមផ្អែម គឺខ្វះជាតិអាំងស៊ុយលីន ឬមានលទ្ធភាពកាន់តែតិចក្នុងការប្រើ ប្រាស់អ័រម៉ូន ដែល​អនុញ្ញាត​ឲ្យ​ជាតិ​ស្ករចូល ទៅក្នុងកោសិកា និងបំប្លែងទៅជាថាមពល។ ប្រសិនបើជំងឺទឹកនោមផ្អែម មិនអាច​ត្រូវ​បាន​គេ​គ្រប់​គ្រង​បាន​ឲ្យល្អនោះទេ ជាតិស្ករ និង ខ្លាញ់នៅតែស្ថិតនៅក្នុងឈាម ហើយយូរៗទៅនឹងធ្វើឲ្យសរីរាង្គសំខាន់ៗ ត្រូវខូចអស់។

ការស្រាវជ្រាវនេះ បានរកឃើញថា អាហារដែលមានដាក់សណ្តែកអាល់ម៉ង់ច្រើន អាចនឹងជួយបង្កើតអាំងស៊ុយលីន ហើយកាត់បន្ថយ កម្រិត LDL នៅក្នុងខ្លួនអ្នកដែលស្ថិតក្នុងដំណាក់កាលដំបូងនៃការកើតរោគទឹកនោមផ្អែម។ អ្នក​ដែល​ស្ថិតក្នុងដំណាក់កាលដំបូងនៃ ការកើតរោគទឹកនោមផ្អែម គឺជាអ្នកដែលមានកម្រិតជាតិស្ករខ្ពស់ជាងធម្មតា ប៉ុន្តែ​មិនទាន់ខ្ពស់ខ្លាំង ដែលគេអាចកំណត់ថ្នាក់ចូលជា រោគទឹកនោមផ្អែមនៅឡើយទេ។

ការសិក្សានេះ ត្រូវបានគេធ្វើឡើង នៅសកលវិទ្យាល័យវេជ្ជសាស្ត្រ និងទន្តសាស្ត្រនៃរដ្ឋញូវជឺស៊ី (New Jersey) សហ​រដ្ឋ​អាមេរិក ដោយគេបានតាមដានពីលទ្ធផលនៃការបរិភោគអាហាររួមមាន សណ្តែកអាល់ម៉ង់ របស់មនុស្សពេញវ័យ ៦៥​នាក់​ ដែលស្ថិតក្នុង ដំណាក់កាលដំបូងនៃការកើត រោគទឹកនោមផ្អែម។

ក្រុម​​អ្នកហូបអាហារដែលមានលាយសណ្តែកអាល់ម៉ង់ បានបង្ហាញពីការប្រសើរឡើងក្នុងការ ផលិត​ជាតិ​អាំង​ស៊ុយ​លីន​ និងមានការ ធ្លាក់ចុះច្រើនគួរឲ្យកត់សម្គាល់នូវកូឡេស្តេរ៉ូល LDL បើប្រៀបធៀបជាមួយនឹងក្រុមដែលហូបអា​​ហារ​មិន​មានលាយសណ្តែកអាល់ម៉ង់៕