មានការប្រកែកគ្នាក្នុងចំណោមអ្នកទទួលទានអំពីអត្ថប្រយោជន៍សុខភាពរវាងអង្ករសំរូបនិងសម្រិត ។ ពិតណាស់ បើទោះជាអង្ករសម្រិតគឺជាជម្រើសរបស់មនុស្សភាគច្រើនដោយសាររសជាតិនិងពណ៌របស់វា ប៉ុន្តែបើនិយាយពីអត្ថប្រយោជន៍ចំពោះសុខភាពវិញ ចំណាត់ថ្នាក់ពិតជាបានទៅអង្ករសំរូប ។
Mickey Mehta អ្នកឯកទេសសុខភាពទូទៅបាននិយាយថា ដំណើរការម៉ាស៊ីនដោយកិនយកត្រឹមតែសម្បករឹងចេញមិនបានធ្វើឱ្យប៉ះពាល់ដល់សារធាតុចិញ្ចឹមរបស់គ្រាប់ស្រូវនោះទេ ហើយដែលនេះគឺជាមូលហេតុនាំឱ្យអង្ករសំរូបផ្តល់អត្ថប្រយោជន៍ដល់សុខភាពអ្នកទទួលទាន ។ ផ្ទុយពីនេះ ការកិនស្រិតដោយម៉ាស៊ីនដើម្បីធ្វើឱ្យគ្រាប់អង្ករក្លាយជាពណ៌សស្អាតគឺបានធ្វើឱ្យបាត់បង់នូវបណ្តាវីតាមីននិងសារធាតុចិញ្ចឹម ។
ការពិសោធដែលធ្វើដោយអ្នកជំនាញ បានបង្ហាញថា ក្នុងអង្ករសំរូបចំណុះ១ពែងកាហ្វេផ្ទុកម៉ង់កាណែស ៨៨ភាគរយ សេលីញ៉ូម ២៧.៣ភាគរយ ម៉ាញេស្យូម ២០.៩ភាគរយ tryptophan ១៨.៧ភាគរយ និងកាឡូរីត្រឹម១២ភាគរយប៉ុណ្ណោះ ។ ដោយឡែកការយកអង្ករសំរូបនេះទៅកិនសម្រិតឱ្យសវិញគឺបំផ្លាញ សារធាតុដែក ៦០ភាគរយ វីតាមីន B1 ៨០ភាគរយ វីតាមីន B3 ៦៧ភាគរយ វីតាមីន B6 ៩០ភាគរយ ។ ឯសារធាតុផ្សេងទៀតមានដូចជា ផូស្វ័រ ម៉ង់កាណែស និងសារធាតុសរសៃបានបាត់អស់ជិតពាក់កណ្តាលផងដែរ ។
យោងតាមអ្នកជំនាញ អង្ករសំរូបផ្តល់អត្ថប្រយោជន៍ច្រើនយ៉ាងដល់សុខភាពអ្នកទទួលទានជាប្រចាំ ។ ជាមួយនឹងសារធាតុសរសៃដ៏សម្បូរបែប អង្ករសំរូបបានជួយសម្រួលដល់ការធ្វើចលនារបស់ពោះវៀនធំនិងជំរុញឱ្យចុះទម្ងន់ ។ នៅក្នុងអង្ករសំរូប១ពែងកាហ្វេផ្តល់ឱ្យរាងកាយនូវម៉ង់កាណែសប្រមាណជា៨០ភាគរយនៃតម្រូវការប្រចាំថ្ងៃ។ ម៉ង់កាណែសមាននាទីជួយបង្កើតខ្លាញ់កូឡេស្តេរ៉ូលល្អ។ ជំនួសការទទួលទានបានអង្ករសម្រិតដោយអង្ករសម្រូបអាចជួយកាត់បន្ថយហានិភ័យកើតជំងឺទឹកនោមផ្អែមប្រភេទ-២ ។ នេះគឺជាការបញ្ជាក់របស់ឯកទេសសុខភាពលោកMickey Mehta ៕
ប្រភព៖ កោះសន្តិភាព
No comments:
Post a Comment